Yevonde ezinbesteko izena da britainiar argazkigintzaren historian. Erresuma Batuko lehen mugimendu feministekin lotutako sufragista honek Londresen ireki zuen bere estudioa 1914an, publizitate-argazkian eta enkarguzko erretratuan aritzeko. Genero horiek txikitzat jotzen ziren, eta emakume argazkilari askok, ospe handiagoko esparruetan ongietorriak ez zirenek, garapen profesionalerako espazio on bat aurkitu zuten bertan.

Yevonde berehala bihurtuko zen izen handiko erretratugile, originaltasunagatik, umoreagatik, klasizismoaren eta modernitatearen arteko orekagatik, gustu esperimentalagatik eta, batez ere, kolorearen erabilera aitzindariagatik estimatua. Vivex Natural Colour Print sistemarekin –prozesu karbrotrikromatikoaren bariazio bat da, 3 geruza bereizitako metodo sustraktiboa erabiltzen duena, bat kolore primario bakoitzerako–, abeslariak, aktoreak, kirolariak, royalak eta goi-gizartekoak hilezkor bihurtzen ditu inoiz ikusi gabeko fantasia, freskotasun eta ausardiarekin, eta hamarkadak aurreratzen zaizkio celebritiak pop ikono gisa irudikatzeari. “Inpresio bakoitza esperimentu bat da”, dio, “koloretako argazkiak ez baitu tradiziorik, etorkizuna baizik”.

Yevonde Middleton (1893-1975) argazkilari britainiarra izan zen, erretratu-argazkigintzan kolorea erabiltzen aitzindaria. Streatham-eko (Londres) familia aberats batean jaioa, Belgikan eta Frantzian ikastera bidali zuten, eta han sufragisten mugimenduarekin harremanetan jarri zen. 1914an, 21 urterekin, bere estudio propioa ireki zuen Londresen, eta bertatik antzerki eta literatura munduko pertsona ospetsuak zein aristokraziako kideak igaro ziren. 1930eko hamarkadatik aurrera, koloretako argazkigintzan esperimentatzen hasi zen, Vivex kolore-subtraktiboko prozesua erabiliz, eta sormen-jarduera biziko aldia hasi zuen. Bereziki nabarmendu zen Goddesses (Jainkosak) izeneko 1935eko serieagatik, goi-gizarteko emakumeak erretratatzen zituena. Bere lan berritzaileak ospea ekarri zion, baita errege-familiaren arreta ere. Bere ondarea bizirik dirau, eta 2023an bere lanaren atzera begirako erakusketa bat antolatu zen National Portrait Gallery-n.

Yevonde (Erresuma Batua, 1893)
Life and Colour

2025eko edizioa
Kanpoko instalazioa
Non: San Nikolas Plaza